Se spametite kad ste bili mići kako je bilo za Mikulu?

Kad san bila mića se mi se nekako činilo velo. Tako mi se i Mikula činil veli, i još z onun baretun i šćapon, ni mi bil drag. Pul njega je vavek bil i onaj črni, ča karbun nosi, vavek pijan.  A kako mi pak taj ni bil drag…

Va filmeh su imeli lepega Djeda mraza va črjenoj vešte a mi smo imeli ovega grdega ki mi je malo ličil na barba Vladota ki je va vrtiće bil za sve ča sej’ razbilo. Hm… Pokle puno let, kad ti pride va glavu da je barba Vlado bil Mikula, va niš više ne veruješ!

Va vrtiće se vadilo napamet Mikuli u čast. Tete bi kantale a mi bi kot papagaloti za njimi kako je ki znal i arival. Govorili su nan da ćemo dobit karbun i šibu ako ne budemo dobri.

Dobila bin ja tu šibu ali nisan verovala da je to zato ča san bila zločesta. Dobili su si. Kristijan, za kega san siguro znala da je zločest je dobil velu šibu s fjoki a dobila je i Vedrana ka mi je bila najboja prijateljica i za ku san znala da je dobra.

Delale su se kolajnice od karti tutta forza. Kilometri teh kolajnic bi se storlio pa bi se to obesilo na vrata Doma kako ukras. Ni bilo lampic, balica i drugega luštrega. Samo tu i tamo ka crvena zvezda, na zide, kraj Titova portreta.

I onputa bi prišal taj dan, deca bi stala na pozornicu Doma va najlepšoj robe i teta bi nas poštivala po bine. Od najvećeg do najmanjeg. Veli strah je bil na toj bine. Nismo znali ni kako se zovemo ni onistu kiticu ku smo trebali znat na pamet. Moja je kitica ovako šla:

Bio jednom jedan lav …
Kakav lav?
Strašan lav,
narogušen i ljut sav!

To ću zavavek znat, kad me na uru za ponoćun zbude, ja ću znat moju kiticu napamet! Toliki teror su tete va me dale. Drugi su imeli pjesmice o snege i zvončićeh. Ja san imela pjesmicu o lavu. Kakove veze ima taj lav s Mikulon nikad nisan doznala. Moja mama je rekla da san ja najboje recitirala i da to ča san va isto vreme i skucala od straha ni bilo grdo.

None i nonoti oduševljeno su pljeskali za svaku našu pjesmicu a mi smo komać čekali da sve to fini. Aš, kad to fini, prihaja ono najboje! Saki dobije jedan najlon va ken je obavezno čokoladna tabla, Kroki i Kiki. To je bilo ono za ča smo svi kantali.

Kad san bila mića se mi se činilo velo, ma ono ča je bilo va ten najlone, činilo mi se jako velo!