MarketingMariner keramika
Foto

Pusni odbor Matulji dignuo je pusta

Pust Matulji Foto Denis Viškanić
foto: Denis Viškanić
Korona, da bi njoj kapja pala, zela nan je skoro pa se!
Tako je svoj post na Faceboku započeo Pusni odbor Matulji. Započelo je peto godišnje doba a evo što nam poručuju iz Pusnog odbora Matulji:
Ma kapić je ipak ostal. Kapić, ma jušto dosti da se još vavek oćutimo da smo živi, da smo tu i da nan nijedna sila nan ten svete ne more zet našega Pusta i naše užanci za keh su naši noni i nonoti , svojni, na jednoj bandijere zapisali da se nete nikad maj zatrt!
Tako smo i mi zapoštali da užancu nećemo prekinut, a još manje zatrt i da će Pust pul Matuj viset na pale ovako al onako. Nopak al naprav! Ova sakramenska korona će finit prej, al pokle i neće je bit, ma mi ćemo ostat i obastat jušto kako i se nemotarije i cirkusi keh nan je pul Matuj trpet i s kemi nan je i naprvo živet.
Mi smo blaženi! Drugde je kriv Obi, Bandić, Plenković, Milanović, Merkelica al pak Trump, a pul nas je za se kriv samo ON – PUST! Ki j kriv? Pust! I pul Matuj se si problemi tako reše. Pust je kriv, važgat ćemo ga i rešili smo si naši problemi. I živet ćemo daje va mire i sloge, to se zna, do pred izbori, a onda ćemo doznat ki blatne mudandi i raskinjene kalceti nosi, kemu z ust smrdi, ki je kemu va žep ča stavil i ki je svoji tereni za interes prodal.
Naš Pust, to van moremo z oven puton i na of način reć ima i blatne mudandi i raskinjene kalceti i ne hote to poskriveć gledat. A i z ust mu smrdi kot i tereni ki su se prodali. Ma se je to za našo „boje“. A boje će nan bit aš ćemo još jednu velu butigu dobit. Sa sreća. Do sada smo ih imeli koš, a od sad ćemo imet koš I JOŠ. Pak ki će se z nami.
Marčapije za nogi polomit, v Lisinu se z auton ne more ni prit, ma za sreću se ima kamo poć ča kupit. Kruh se, na priliku, more va deset butig kupit, i va deset oštarij, kad ih opet otpru, kafe popit. Pak kad ih je toliko zač ne otpret još jednu. Pak neka se vidi raskoš. Od Permani do Mun nijedna, a pul nas sto i jedna. E moj Puste ča ti delaš! I zaspraven, samo ti si kriv! Si drugi imaju nekakovu škužu, a kad malo zagusti skriju se va bužu.
I još bi ti se moglo reć čuda tega, ma ni koristi: tvoje doba jako kratko dura. A ovo leto je još i kraće i moremo si skupa opet Pustu šit gaće. Posrane i kratke, ma nan opet jako slatke.
Po konobah ćemo pit, sost i kantat, valda nas neće kakov dobar sused kužat. Šperamo se da će i se to jedanput finit, držimo se kurajo, čuvajmo svojo i užancu staru. Balti vajer ! Pust na pale visi! Pust je jedno velo trubilo i kad ga važgemo da opet bude kot da nikad niš ni bilo!

137604292_2524727997828393_4358327900838908077_o  139672969_2524724364495423_7027498154253898517_o  139688616_2524722734495586_8922727637186184141_o  139722654_2524723821162144_691330030609683830_o  139726588_2524734377827755_3479297600680942272_o  139726590_2524727497828443_1510334512117222946_o  139743420_2524733394494520_7624169500218376608_o  139744201_2524727171161809_4555839792655294999_o  139753403_2524728294495030_7772433290282931571_o  139753564_2524736741160852_6451289124225732584_o  139763214_2524724811162045_6117409507876170550_o  139780999_2524740187827174_6499245511281168437_o  139787643_2524733977827795_351958358839691482_o  139856818_2524739647827228_4901072498162762282_o  139916839_2524739241160602_4666937155829864385_o  139938122_2524728937828299_8583047809566139043_o  139953353_2524735774494282_8725040443125635731_o  139956008_2524723277828865_8746766020773549564_o  139980762_2524736324494227_6015560672688234528_o  139999369_2524734877827705_4967702831797884664_o  140001360_2524735381160988_1119214871914836318_o  140058829_2524729351161591_8157215772552261684_o  140223290_2524748174493042_7129620601066503994_o

55555
MarketingMNK Gorovo

Zadnje novosti

To Top